لمزارعى البطاطس ” النيلى” .. رسائل مهمة للدكتور فهيم للنهوض بالمحصول
مزارعي البطاطس النيلي .. ركزوا …
يشتكي كثير من مزارعي البطاطس النيلية ( الشتوية المبكرة) من ضعف ومحدودة التحجيم والإنتاجية عموماً في المنيا والمنوفية والمنصورة وغيرها …
يا ترى أيه السبب ؟؟؟
طب ركزوا معانا شوية …
بسبب ان الأجواء الحارة كانت طول شهر 9 و 10 وكمان حتى نص 11 اثناء موسم النمو للبطاطس… فحدث استنزاف وضغط كبير على النمو وتأثر وتراجع كتير … وبعد انكسار الحرارة وسيادة جو معتدل إلى بارد (ليلاً) بدأ الزرع فى اعطاء نمو خضري غزير (جداً) لدرجة ان النمو اللى حصل فى الاسبوعين اللى فاتو بس بكل النمو خلال الموسم كله ….
وده معناه ايه؟؟
ان العمر الحقيقي للزرع ناقص من 20 -25 يوم ولا يحسب من الزراعة .. والنقطة دي مهمة جداً جداً جداً .. لان البطاطس الان تعطي جهد غير طبيعي للنمو الخضري رغم ان العمر ده بتاع الصب والتحجيم … وعشان البطاطس تعطي محصول (ذو شأن ) لازم نصبر عليها الموسم ده وبلاش استعجال التقليع … بلاش استعجال التقليع ..
عشان كمان البطاطس لا تعطي كامل محصولها الا فى الشهر الاخير من عمرها (الحقيقي) …. وفى ظل ان السوق هيكون ماسك نفسه وحتى اخر شهر 12 .. فبكررر تاني … بلاش الاستعجال فى التقليع ..
وهنا فيه شوية توصيات هامة خاصة بإدارة ما تبقي من موسم الانتاج (للعروة النيلية) سواء فى المنيا او الطويلة وبلقاس وطلخا او منوف او كفر الدوار… وغيرها :
– اضافة من 10 -12 كيلو بوتاسيوم (0 . 0 . 50) حقناً مع مياه الري وخلال الريات المتبقية من الموسم…
– اضافة من 3- 4 لتر حامض فسفوريك (80-85%) حقناً مع مياه الري مع عدم خلطه مع البونتاسيوم ويكرر لمدة ريتين متتاليتين ويساعد جداً فى دعم الدرنات فى عمليات التحجيم.
– الابتعاد عن اضافة اى مصدر للازوت فى كل المركبات اللى هنضيفها خلال هذه الفترة .. لان معظم الزراعات المبكرة فى مرحلة “هياج” للعرش واحنا عاوزين الزرع يتجه “بقوه” ناحية الصب والتحجيم والترصين …
*** وللزراعات المتأخرة واللى بتعانى من نمو مش قوى يتم اجراء التالي:
وبعدها يتم رش ورقي :
يتم رش طحالب بمعدل 450جم + احماض أمينية بمعدل 600 / فدان .
اما الري … فلو سمحتم … لو سمحتم بلاش 4 – 5 فتحات مرة واحدة دي .. ارجوكم الحذر من زيادة مياه الري خلال هذه الفترة (كمان ان العرش مالى بطاني الخطوط وبيعيق المياه فبتكتر حول النباتات) … الحل ان يكون الري على الحامي وب 2 او 3 فتحات (حواويل) بالكتير …
ان شاء الله سيكون موسم زراعي مجزي لكل احبتي واخوتي مزارعي البطاطس
دكتور محمد على فهيم
1 ديسمبر 2023
21 هاتور 1740
