هاام لمزارعى البطاطس.. تعرف على 7 خطوات مهمة عند زراعة المحصول

صباح الخيرات والرزق الحلال … جمعمتكم مباركة طيبة
تخضير البطاطس
بداية تجهيز الارض لزراعة البطاطس “الصيفي” فى المناطق اللى بتزرع العروة دي مبكر في جنوب الجيزة (قلعة المرازيق – الشوبك – ابو رجوان – العياط …) القليوبية – دجوى ، المنوفية – الطويلة وطلخا وبلقاس – ابيس – نكلة العنب …الخ.

اتبع التالي بدون تعقيدات:
على البلاط قبل الحرث او بعد الحرثة الاولى وقبل التخطيط اعمل ما يلي:

1** البطاطس محصول منهك للتربة ومستنزف لها “جداً” – السباخ البلدي المتحلل (20 م3) يغنيك عن كثير من نقص العناصر فى التلت الاخير من عمرها ..

2** الارض السودة ثقيلة مدمجة باردة عشان كده من 10-13 شيكارة سوبر فوسفات الكالسيوم يعود لها دفئها وحيويتها وخفتها ونعومتها حول الدرنات المتكونة لاحقاً ..

3* الانبات كلها هيكون فى فترة باردة (اخر ديسمبر ويناير) فالبطاطس محتاجه جرعة تنشيطية من الازوت (بطيء التحلل) لزيادة معدل الانبات عشان كده من 2 شيكارة سلفات نشادر 20.5% هامة جداً لهذا الغرض.

4** وعشان تطهر التربة من بقايا فطريات وامراض التربة من الزرعة السابقة وعشان يكون فيه وسط غذائي مناسب للزرعة طول الموسم عشان كده من 1-2 شيكارة كبريت زراعي هتقوم بالغرض ده والكبريت عنصر غذائي ووقائي هام للبطاطس ولازم يتحول لصورة كبريتات ايونية بالتالى لازم يتمعدن داخل الترية ولذلك يضاف فقط مع التجهيز وقبل التخطيط ومش على وش التربة.

5** يتبقي اضافة هامة (للى يقدر عليها) اضافة من 1 – 2 شيكارة سلفات بوتاسيوم مع اخوتها السابقين – بيعمل حاجات حلوة مع الغلة (الدرنات) اللى هتنتج من غيطك او مزرعتك.

6** التخطيط يفضل الا يزيد عن 9 خطوط فى القصبتين (الموسم ده بالتحديد – لانه للاسف موسم فى اواخره مناسب للسوسة ويفضل يكون اتجاه التخطيط شرق – غرب.

7** اروي رية غزيرة …

وانتظر باقي التعليمات

بعض المزارعين هيشتكوي ان التكلفة كده كتير فى التجهيز … الاضافات دي هي الاساس للموسم كله وهيجنبك مشاكل كتير في الموسم .. ان شاء الله
الصورة المرفقة … تخضير البطاطس الصيفي – قرية قلعة المرازيق – الجيزة 17 نوفمبر ..

د. محمد علي فهيم
18 نوفمبر 2022