رسائل الدكتور محمد فهيم .. ما قل ودل فى زراعة محصول البطاطس

ما قل ودل …
مقولة اطلقها القدماء للتعبير عن القليل الكافي … افضل واوفر ..فخير الكلام ما قل ودل – وخير الفعل ما قل ودل …

من خلال احتكاكي بمزارعين البطاطس ومحاصيل كتير تانية فى كل مناطق الجمهورية اللي بتزرع بطاطس … الاحظ النقيضين تماماً ….

المقارنة اللى جاية دي فى الظروف المناخية الجيدة ….

1*** مناطق تزرع بطاطس بالكاد تعطيها احتياجاتها من التسميد والرش والرعاية … وترد البطاطس الجميل بأقصى ما لديها من نمو وانتاجية .. (600 ك سماد ازوتي + 650 سوبر فوسفات + 100 كجم سلفات بوتاسيوم + رشة واحدة احياناً للمغذيات والهيومات + رشة واحدة مبيد فطري او حشري ) = النتيجة نمو غزير قوي و18-20 طن بطاطس … تتحمل التخزين جداً … بتكلم عن المناطق من الجيزة وانت رايح قبلي ….عدا بعض مناطق في المنيا..

2*** ومناطق تبالغ جداً جداً فى “تزغيط” البطاطس كل انواع والوان المبيدات والمغذيات ومحفزات النمو وكميات كبيرة من الاسمدة … (800 ك سماد ازوتي + 750 سوبر فوسفات + 200 كجم سلفات بوتاسيوم + من 15-20 رشة للمغذيات والهيومات والعناصر الصغرى والطحالب والمبيدات الفطري و الحشرية ) = النتيجة نمو غزير “حساس جداً” وبرده من 18-20 او احيانا 22 طن بطاطس … في الغالب لا تتحمل التخزين … بتكلم عن كل بحري تقريبا …

المقصود ايه من الكلام — ان البطاطس لا تحب التعقيد او التزغيط او الفلسفة .. لان للاسف المزارعين بيبصو لبعض في كل حاجة اكتر ما بيعرف هم بيعملوا ايه .. المهم فلان عمل وعلان عمل … وانا عارف ان فيه اختلافات بين المناطق سواء في خصوبة التربة أو طريقة الزراعة أو طريقة الري أو حتي المناخ .. بس اللي اعرفه ومتأكد منه أن احتياجات البطاطس مبتختلفش “كتير”…
وكمان ان البساطة (بعلم) احياناً افضل مائة مرة من “المبالغة” بجهل… كما ان اى زيادة فى التكاليف ولو جنيه واحد هو خصم من الايراد ..

الصور المرفقة – زراعات بطاطس في جنوب الجيزة ..

دكتورمحمد علي فهيم