المتابعين الاعزاء الكرام …
كل عام وحضراتكم بألف خير وسلام ورضا وستر …
بشرى طيبة فى انكسار الموجة الأشد في الحرارة … بسبب تدهور المرتفع الجوي نتيجة ضغط الكتلة الشمالية المندفعة من ناحية أوروبا …
** يبدأ الانكسار بداية من ليل اليوم السبت 15-6 من اقصى الشمال الغربي ( الساحل الشمالي ومطروح والمحافظات الساحلية ) ..
** يوم الاحد 16 – 6 ( أول يوم العيد) يستمر توغل الكتلة الهوائية الباردة لتكسر حرارة الاجواء بحوالى 5 درجات على مناطق شمال الدلتا والوجه البحري والقاهرة …
** يوم الاثنين 17 – 6 ( تاني يوم العيد) تتوغل الكتلة الباردة لتكسر حرارة مصر الوسطى وشمال الصعيد وحتى سوهاج وقنا ..
** يوم الثلاثاء 18- 6 ( تالت يوم العيد) تتوغل الكتلة الباردة لتصل مناطق جنوب الصعيد .
مع الوضع فى الاعتبار اننا في الاسبوع التاني من بؤونة … يعني فعلياً دخلنا فى الصيف شديد الحرارة … يعني ما زالت الاجواء شديدة الحرارة لكنها طبعاً اقل من الموجة الحالية بكتير …
وبرده نخلي بالنا فى الفترات ما بين اموجات بيكون هناك سرعات عالية من الرياح وممكن انها تكون محملة بالرمال والاتربة ( متوقع فى مناطق الواحات وجنوب الصعيد وبعض المناطق المتفرقة ) على فترات متفرقة …
ويمكن دي فرصة كويسة الناس ترتاح شوية من صهد ونقارية اليومين اللى فاتوا ويقضوا العيد فى راحة شوية …
بس دي فرصة محدودة للمزارعين انهم بداية من تاني يوم العيد نبدأ في انجاز العمليات الزراعية المؤجلة نتيجة الموجة …
*** اضافة دفعات الاسمدة الازوتية لكل الزراعات ( محاصيل وخضر ) حسب المحصول ..
*** تكثيف عمليات تحجيم الفاكهة ( مانجو – زيتون – برتقال – ليمون – تين – تمور – جوافة صيفي …. الخ) بمركبات البوتاسيوم والسيتوكينينات منخفضة التركيز …
*** رش المبيدات الجهازية خاصة للآفات اللى هيناسبها التذبذب ده فى الحرارة ( دودة الحشد – الحشرات القشرية والبق الدقيقي – دودة براعم الزيتون – ديدان الاوراق والثمار على كل المحاصيل – ذبابة الفاكهة ( هام جداً) – العنكبوت الاحمر … الخ ) وكذلك امراض الانثراكنوز والتبقعات وخلافه ..
** اجراء الزراعة المؤجلة للمحاصيل الصيفية والشتل للخضر للعروة الصيفية المتأخرة ( طماطم – فلفل – باذنجان ) الخ …
** معالجة زيادة معدلات التنفيل ( تساقط الزهر والعقد الحديث ) في الخضر ( فيه منشور مفصل عن كده على الصفحة ) …
** رش ثمار الفاكهة بعاكسات الحرارة ( سليكات الومنيوم – جير مخفف ) او اجراء عمليات التكييس في المانجو والرمان … الخ ..
حفظكم الله جميعاً وحفظ ارزاقكم من كل سوء ..
وكل سنة وحضراتكم جميعاً بالف خير وسلام وسعادة
برجاء عمل شير للمنشور وتكثيف التفاعل على المنشور ده
دمتم طيبين ..
دكتور محمد على فهيم
15 يونيو 2024
9 ذو الحجة 1445
8 بؤونة 1740
