القمح : استخدم سلفات نشادر او نترات نشادر بمعدل 1.5 شيكارة للفدان كجرعة تنشيطية مع الزراعة هام جداً – وبلاش تأخر رية التشتية عن 20 -25 يوم وضيف مع رية التشتية 10 لتر حامض فسفوريك او 3-4 كجم ماب لزيادة تنشيط الجذور ودفع النباتات للتفريع.
الفول: العناية بالفسفور في المراحل الأولى والاستعداد التام لإصابات التبقعات اللى هتزيد مع الرطوبة العالية مع فحص النباتات جيدا لوجود حشرات المن والندوة العسلية وعند تواجد اكثر من 4 حشرة علي الوريقة يتم الرش فورا بأحد المبيدات للثاقبة الماصة .. بعدها يتم تكثيف اضافة البوتاسيوم في صورة نترات او سترات لزيادة معدلات التزهير في مرحلة لاحقة.
البنجر: توقف إضافة أي ازوت بعد 90 يوم وبداية إضافة البوتاسيوم وحتى عمر 130-140 يوم مع الاستعداد تماماً لظهور التبقع السركسبوري وضروري جدا الرش الوقائي بأكروبات النحاس بالتبادل مع مبيد اوبص …
البطاطس الشتوي: محدش يضيف اي منظمات نمو البطاطس بعد 90 يوم عشان ميحصلشي تشقق للدرنات .. فقط البوتاسيوم في صورة نترات او سترات بمعدل 1.5 كجم للفدان رشاً مع 30 سم سيتوكينين 4%… هام جدا وعاجل الرش الوقائي ضد الندوة المبكرة بالمواد الفعالة مفينوكسام وميتالكسيل بالتبادل مع ازوكسي ستروبين.
البطاطس الصيفي: لا تزرع مبكراً حتى لو الأرض جاهزة ومتزرعشي في أرض ما زالت بها نسبة رطوبة عالية وممنوع استخدام اليوريا في الدفعة الأولي من التسميد يفضل أن تكون سلفات نشادر أو نترات نشادر.
الفاصوليا الشتوي : من المهم الا تزيد كمية المياه عشان الرطوبة ما تزيدش ويحصل مشكلة اللفحة الهالية او العفن الابيض على القرون …
الفراولة: ممنوع الرش بالاحماض الامينية تماما .. دي فترة العفن الرمادي وخاصة في الأجواء الباردة وزيادة الندي… مع الاهتمام قوي بعالي الفسفور…
البسلة: محدش يرش اي نحاسيات دلوقتي أثناء التزهير والعقد ..
البصل المقور او السبيعني : أفضل ميعاد لاستخدام البورون رشاً علي الأوراق يكون قبل حصاد التقليع بحوالي 20 يوم على الأكثر ، ويمكن رشه بمعدل 1.5 سم لكل لتر مياه ويمكن خلطه مع مركب الكي تي اي KTS بمعدل لتر للفدان …
البصل الفتيل : ضرورة تطهير ارض المشتل قبل الزراعة وخاصة في الأراضي اللى ظهر فيها العفن الأحمر قبل كده.
الثوم : تخفيف نسبة الرطوبة تحت النباتات وتطويل الفترة بين الريات .. ومعالجة ظهور اصفرار اطراف الاوراق وهو في الغالب نقص بوتاسيوم وماغنسيوم بسبب توقف الجذور عن امتصاصهما بسبب بداية انكسار الحرارة ليلاً وزيادة فرق حرارة الليل والنهار او تشبع التربة بالمياه… وفحص النباتات جيدا لذبابة البصل الكبري .. ومتستعجلوش رش الكالسيوم بورون دلوقتي … وخليك في البوتاسيوم فوسفيت والماغنسيوم فوسفيت شوية …
الطماطم المكشوفة (عروة الصعيد) : الحذر كل الحذر من البياض الدقيقي والندوة المبكرة على الأوراق والثمار .. ضروري التعامل بالكالسيوم فوسفيت بالتبادل مع سترات بوتاسيوم …
الخضر الشتوية فلفل وباذنجان : تكثيف اضافة البوتاسيوم والماغنسيوم وهااام جدا الفحص لحشرات تربس الازهار … في ازهار النباتات وخاصة تحت الصوب …
الكمون والكزبرة والكراوية والشمر : عدم زيادة المياه خلال الرية الأولى مع الاعتناء باضافة المطهرات الفطرية مع الري ضد اعفان الجذور زي الكاربندازيم مع التوبسين.
البرسيم : محدش يأخر الحشة الحالية واخلصو من الوش ده بدري عشان النبات يفوق بعد البرد مع إضافة حامض فسفوريك مع الرية اللي جاية 10 لتر…
دكتور محمد علي فهيم
