الكلام اللى جاي ده هام ومهم …
عشان الكل بيسأل ايه اللى بيحصل ده
صيف قياسي وأجواء ومناخ غريب …
ولاحظنا ان التراكيب المحصولية أتأثرت وبتتأثر وهتتأثر ..

وبالمتابعة المستمرة مع اهالينا المنزارعين لوحظ ما يلي:

الذرة : وهي اكتر المحاصيل اللى ظهر فيها ظواهر جديدة سواء في مشاكل في النمو او ظهور بعض الامراض المستجدة زي عفن الساق البكتيري وغيره ، ده بالإضافة إلى زيادة في موضوع الكيزان الفارغة من الحبوب نتيجة فشل الاخصاب …

الأرز : ضعف عام في النمو وزيادة حدة اصفرار الأوراق السفلى واحتراق الحواف وبنحذر من تهيئة النبات للإصابة باللفحة وثاقبة الساق ( دودة القصب الصغرى) …

القطن: وده حصل فيه المتناقضين – اما ضعف في النمو وقرمشة في الأوراق او هياج في العرش وتسرولة وتأخير في التزهير وتوزيع غير منتظم في خروج اللوز ( الوسواس ) …

السمسم : ظهور مكثف لمشكلة سروالة العيدان وضعف السيقان والافرع وتأخير وضعف التزهير واحيانا ضعف في النمو واصفرار في الأوراق ..

الصويا : زيادة واضحة في موضوع اصفرار الأوراق وضعف النمو بصفة عامة …

البطاطس الصيفي : لوحظ ان الدرنات المخزنة تحت القش حصل لها تدهور سريع وزيادة في نسبة التالف والفاقد ..

الطماطم (عروة يونيو ويوليو) : ودي اللى اتأثرت جداً ونمو غير طبيعي متقزم ومفيش تزهير او عقد وزيادة موضوع “الكبسنة” .. ودي هيكون لها كلام كتير ان شاء الله ..

الفلفل : زيادة واضحة في تشوه القمم النامية في النبات وتأخير التزهير وزيادة معدلات التنفيل ..

المانجو والزيتون والموالح : تأخير في معدلات التحجيم والتلوين بصورة واضحة جداً ..

العنب البناتي : خاصة اللى موجود في وسط الدلتا ( الغربية والدقهلية ) وده لخامس سنة على التوالي يكون فيه مشاكل كتير والسنة دي ظهرت بكثافة اكبر خاصة تأخر التزهير وضعف كبير في حجم العناقيد ..

البرسيم الرباية : ضعف عام في معدلات التزهير والنوار واحتراق الأوراق السفلى…

ده غير ضراوة وزيادة تعداد الحشرات وخاصة الثاقبة الماصة ( المنّ – التربس – الجاسيد – الذبابة البيضاء – الحشرات القشرية – البق الدقيقي ) ودودة الحشد وذبابة الفاكهة وحفار ساق الزيتون وذبابة المقات وده غير الامراض خاصة الفطرية و البكتيرية زي امراض كتير استفحلت ومنها اللفحة المتأخرة على البطاطس واللطعة الارجوانية ولفحة استيمفيليوم على البصل والثوم واعفان الجذور والثمار على الفراولة وكتير من المحاصيل خاصة الخضر …

في منشورات مفصلة خلينا نشوف مع بعض ايه حصل للمحاصيل دي بالتفصيل وايه الوقاية او العلاج من كل المشاكل ده …

ربنا يبارك في جهودكم ويرزقكم رزق حلال مبارك فيه …

حفظكم الله وحفظ ارزاقكم وبلادكم من كل سوء