في ظل التدرج فى انخفاض الحرارة ليلاً خلال هذه الفترة وتستمر حتى نهاية شهر طوبة على الأقل … وجب علينا ان نستجيب للتحذيرات وننفذ التوصيات التالية :
1- الفاصوليا الصيفي : محدش يزرع فاصوليا صيفي قبل ١٥ فبراير…
2- البنجر عروة اغسطس: محدش يصرف في البوتاسيوم للبنجر اكبر من ١٤٠ يوم زيادة عن اللزوم .. ويرش بورون ١٤ ٪ مرتين .. عشان موضوع السكر الكاذب.
3- البطاطس الشتوي: محدش يضيف اي منظمات نمو البطاطس بعد ٩٠ يوم عشان التحجيم .. فقط البوتاسيوم والكالسيوم.
4- البطاطس الصيفي: محدش يروي البطاطس مرتين ورا بعض بدون عزيق لاي سبب .. وممنوع استخدام اليوريا والدفعة الأولي من التسميد يفضل أن تكون ٣ سلفات نشادر مع ٢ نترات نشادار بنظام خط وخط.. استخدام اليوريا بكثرة بيسبب أنها في سنوات اللفحة بتبدأ من الأرض دي أو زيادة تشقق الدرنات في الأصناف الحساسة أو زيادة الإصابة بالمن … الخ
5- الفراولة: ممنوع الرش بالاحماض الامينية تماما .. دي فترة العفن الرمادي وخاصة بعد انتهاء موجة البرد وزيادة الندي…
6- المانجو المتأثرة بالبرودة: محدش يزيل الافرع الجافة دلوقتي حتي يحدث جريان العصارة في الأشجار … ويجب الانتهاء من تقصيف الازهار المبكرة في الأصناف المحلية علي نهاية الاسبوع ..
7- البسلة والفول: محدش يرش اي نحاسيات دلوقتي أثناء التزهير والعقد ..
8- البصل الفتيل: متستعجلوش الرش المكثف علي البصل .. استنو بعد إجراء الرية الأولي..
9- الثوم: متستعجلوش رش الكالسيوم بورون دلوقتي … وخليك في البوتاسيوم فوسفيت والماغنسيوم فوسفيت شوية …
10- الخرشوف: اللي لازق وبيأخر الجمع قوي والورق بتاعه أبيض .. ما ترشوش اي احماض امينية أو منشطات .. فقط كالسيوم فوسفيت وسترات بوتاسيوم…
11- القمح: ممنوع استخدام مبيدات الحشائش في العمر اكبر من ٤٠ يوم … ويمكن استخدام على سبيل المثال مبيد هربينو ٢٥٠ سم لـ ٢٠٠ لتر ماء فدان للزمير .. وللعريضة مبيد جرناري ..
12- البرسيم: محدش يأخر الحشة الحالية واخلصو من الوش ده بدري عشان النبات يفوق بعد موجة البرد مع إضافة حامض فسفوريك مع الرية اللي جاية ٧ لتر.
13- العنب المبكر – متطولشي الفترة ما بين التقليم والرش بكاسرات السكون … ولو فيه عيون بدأت تتفتح رش بالكبريت الميكروني عالطول ..
14- مزارع المواشي: محدش يزود من التغذية علي برسيم اليومين دول عشان نقص الفسفور علي المواشي وظهور البول المدمل…
15- مزارع الأمهات السمكية: محدش يغير المياه العميقة بتاعة الأحواض تحت البلاستيك ويكتفي بتغيير المياه السطحية بس مع تكثيف حمامات المضادات الحيوية.
تابعوني ربنا يهديكم…
دكتور محمد علي فهيم
17 يناير 2023
8 طوبة 1739
